ന്യൂഡൽഹി: ഉത്തരവാദിത്തപരവും ധാർമ്മികവുമായ ഡിജിറ്റൽ മാധ്യമപ്രവർത്തനത്തിന്റെ സാധ്യതകളും വെല്ലുവിളികളും ചർച്ച ചെയ്ത് സ്വാമി വിവേകാനന്ദ ഡിജിറ്റൽ ജേർണലിസം കോൺക്ലേവ് ആൻഡ് നാഷണൽ എക്സലൻസ് അവാർഡ്സ് 2026 ന്യൂഡൽഹിയിലെ കോൺസ്റ്റിറ്റ്യൂഷൻ ക്ലബ് ഓഫ് ഇന്ത്യയിൽ നടന്നു.
രാമകൃഷ്ണ പരമഹംസ ഫൗണ്ടേഷന്റെ നേതൃത്വത്തിൽ സംഘടിപ്പിച്ച ദേശീയ കോൺക്ലേവ് ജേർണലിസ്റ്റ് ആൻഡ് മീഡിയ അസോസിയേഷന്റെ (ജെഎംഎ) സഹകരണത്തോടെയും ജേർണലിസ്റ്റ് ആൻഡ് മീഡിയ അസോസിയേഷൻ ഗ്രീവൻസ് കൗൺസിലിന്റെ (ജെഎംഎജിസി) രക്ഷാകർതൃത്വത്തിലുമാണ് നടന്നത്. കേന്ദ്ര വാർത്താവിതരണ പ്രക്ഷേപണ മന്ത്രാലയം അംഗീകരിച്ച ഡിജിറ്റൽ ന്യൂസ് ആൻഡ് കറന്റ് അഫയേഴ്സ് പബ്ലിഷേഴ്സിന്റെ ലെവൽ-II സ്വയംനിയന്ത്രണ സ്ഥാപനമാണ് ജെഎംഎജിസി
രാജ്യത്തിന്റെ വിവിധ ഭാഗങ്ങളിൽ നിന്നുള്ള മാധ്യമപ്രവർത്തകർ, നിയമവിദഗ്ധർ, അക്കാദമിക് വിദഗ്ധർ, പബ്ലിക് റിലേഷൻസ് രംഗത്തെ പ്രമുഖർ, നയരൂപീകരണ രംഗത്തെ പ്രതിനിധികൾ, സാമൂഹിക നേതാക്കൾ, വ്യവസായ പ്രതിനിധികൾ എന്നിവർ കോൺക്ലേവിൽ പങ്കെടുത്തു.
രാമകൃഷ്ണ മിഷൻ വിവേകാനന്ദ എജ്യുക്കേഷണൽ ആൻഡ് റിസർച്ച് ഇൻസ്റ്റിറ്റ്യൂട്ട് പ്രോ-ചാൻസലർ സ്വാമി ആത്മപ്രിയാനന്ദജി മഹാരാജിന്റെ അനുഗ്രഹപ്രഭാഷണത്തോടെയാണ് പരിപാടിക്ക് തുടക്കമായത്. സത്യസന്ധത, സ്വഭാവശുദ്ധി, സാമൂഹിക ഉത്തരവാദിത്തം, സേവനം തുടങ്ങിയ ശ്രീരാമകൃഷ്ണ പരമഹംസന്റെയും സ്വാമി വിവേകാനന്ദന്റെയും ആശയങ്ങളുടെ സമകാലിക പ്രസക്തി അദ്ദേഹം വിശദീകരിച്ചു.
രാമകൃഷ്ണ പരമഹംസ ഫൗണ്ടേഷൻ പ്രസിഡന്റ് മോഹൻ ശുക്ല സ്വാഗതവും സെക്രട്ടറി അഷിം കുമാർ മുഖർജി പ്രഭാഷണവും നടത്തി.
ഇന്ത്യയുടെ അയർലൻഡ്, മാലിദ്വീപ് മുൻ അംബാസഡറും ഇന്ത്യൻ കൗൺസിൽ ഫോർ കൾച്ചറൽ റിലേഷൻസിന്റെ മുൻ ഡയറക്ടർ ജനറലുമായ അഖിലേഷ് മിശ്ര ഐഎഫ്എസ് (റിട്ട.) ‘ഇന്ത്യാസ് വോയ്സ് ഇൻ ദ ഡിജിറ്റൽ ഏജ്: റെസ്‌പോൺസിബിൾ ജേർണലിസം, നാഷണൽ ഇന്ററസ്റ്റ് ആൻഡ് ഇന്ത്യാസ് എമർജിങ് ഗ്ലോബൽ റോൾ’ എന്ന വിഷയത്തിൽ മുഖ്യപ്രഭാഷണം നടത്തി.
മാധ്യമധാർമ്മികതയും ഉത്തരവാദിത്തവും, സ്വയംനിയന്ത്രണം, ഡിജിറ്റൽ അവകാശങ്ങൾ, വിവരാവകാശവും സുതാര്യതയും, പൊതുആശയവിനിമയം, യുവജനങ്ങളും ഡിജിറ്റൽ ജനാധിപത്യവും, പ്രാദേശിക മാധ്യമപ്രവർത്തനം, മാധ്യമനേതൃത്വം, ആർട്ടിഫിഷ്യൽ ഇന്റലിജൻസ്, ഇന്ത്യയിലെ മാധ്യമപ്രവർത്തനത്തിന്റെ ഭാവി തുടങ്ങിയ വിഷയങ്ങൾ വിവിധ സെഷനുകളിൽ ചർച്ചയായി.
സാങ്കേതികവിദ്യ അതിവേഗം മാറുന്ന സാഹചര്യത്തിൽ മാധ്യമപ്രവർത്തനത്തിലെ കൃത്യത, വിശ്വാസ്യത, പ്രൊഫഷണൽ ധാർമ്മികത, ഉത്തരവാദിത്തബോധം എന്നിവ ഉയർത്തിപ്പിടിക്കേണ്ടതിന്റെ ആവശ്യകത ചർച്ചകളിൽ ചൂണ്ടിക്കാട്ടി. ആർട്ടിഫിഷ്യൽ ഇന്റലിജൻസിന്റെ സാധ്യതകൾ പ്രയോജനപ്പെടുത്തുമ്പോഴും വസ്തുതാപരിശോധന, എഡിറ്റോറിയൽ ഉത്തരവാദിത്തം, മനുഷ്യന്റെ വിവേചനശേഷി എന്നിവയ്ക്ക് പകരം സാങ്കേതികവിദ്യയെ ആശ്രയിക്കാനാകില്ലെന്നും ചർച്ചയിൽ അഭിപ്രായപ്പെട്ടു.
ഉത്തരവാദിത്തമുള്ള ഡിജിറ്റൽ മാധ്യമപ്രവർത്തനം ശക്തിപ്പെടുത്തുന്നതിൽ ഫലപ്രദമായ സ്വയംനിയന്ത്രണ സംവിധാനങ്ങളുടെ പ്രാധാന്യവും കോൺക്ലേവ് ചർച്ച ചെയ്തു. മാധ്യമരംഗത്ത് പരിശീലനം, നൈപുണ്യവികസനം, ഉത്തരവാദിത്തപരമായ സംരംഭകത്വം എന്നിവ പ്രോത്സാഹിപ്പിക്കേണ്ടതിന്റെ ആവശ്യകതയും ചൂണ്ടിക്കാട്ടി.
കോൺക്ലേവിന്റെ ഭാഗമായി സ്വാമി വിവേകാനന്ദ നാഷണൽ എക്സലൻസ് അവാർഡ്സ് 2026 വിതരണം ചെയ്തു. മാധ്യമപ്രവർത്തനം, നയതന്ത്രം, പൊതുസേവനം, നിയമം, പോലീസ്, പൊതുനയം, പബ്ലിക് റിലേഷൻസ്, കമ്മ്യൂണിക്കേഷൻ, വിദ്യാഭ്യാസം, വ്യോമയാനം തുടങ്ങിയ വിവിധ മേഖലകളിലെ ശ്രദ്ധേയമായ സംഭാവനകൾ പരിഗണിച്ചാണ് പുരസ്കാരങ്ങൾ നൽകിയത്.
ഓൺലൈൻ മാധ്യമപ്രവർത്തകരുടെ അവകാശങ്ങൾക്കും സ്വതന്ത്ര മാധ്യമപ്രവർത്തനത്തിനും വേണ്ടി പ്രവർത്തിക്കുന്ന രാജ്യത്തെ പ്രമുഖ മാധ്യമ സംഘടനകളിലൊന്നായ ജേർണലിസ്റ്റ് ആൻഡ് മീഡിയ അസോസിയേഷൻ (ജെഎംഎ) ദേശീയ പ്രസിഡന്റ് വൈശാഖ് സുരേഷിനെയും ചടങ്ങിൽ ആദരിച്ചു. രാജ്യത്തെ പ്രമുഖ മാധ്യമ സംഘടനകളിലൊന്നായ ജെഎംഎയ്ക്കുള്ള അംഗീകാരമായാണ് ഈ ആദരം. സംഘടനയെ പ്രതിനിധീകരിച്ച് വൈശാഖ് സുരേഷ് പുരസ്കാരം ഏറ്റുവാങ്ങി.
അഖിലേഷ് മിശ്ര ഐഎഫ്എസ് (റിട്ട.), കെ.പി. വെങ്കടേശ്വര റാവു ഐപിഎസ്, വിവരാവകാശ പ്രവർത്തകൻ സുഭാഷ് ചന്ദ്ര അഗർവാൾ, വിജയ് സിംഗ് ബൈൻസ്ല, ഡോ. ധനഞ്ജയ് ഗിരി, ഡോ. സുമീത് സുസീലൻ, ഡോ. ശൈലേന്ദ്ര കുമാർ, ഡോ. സുരേഷ് ഗൗർ, ഡോ. വിജയ് കുമാർ പാണ്ഡെ, ആദിത്യ നയ്യാർ, സന്ദീപ് ഗ്രോവർ, രാഘവ് ശുക്ല, സുധീർ ശർമ്മ, ഭാസ്കർ സന്യാൽ, കേശവ് ശ്രീവാസ്തവ, പ്രദീപ് കുമാർ, മുഹമ്മദ് റഫീഖ് ഖാൻ തുടങ്ങിയവരും വിവിധ മേഖലകളിലെ സംഭാവനകൾക്ക് പുരസ്കാരം ഏറ്റുവാങ്ങി.
കോൺക്ലേവിനോടനുബന്ധിച്ച് അഷിം കുമാർ മുഖർജി രചിച്ച് രാമകൃഷ്ണ പരമഹംസ ഫൗണ്ടേഷൻ പ്രസിദ്ധീകരിച്ച ‘ശ്രീ ശ്രീ രാമകൃഷ്ണ കഥാമൃത – ആസ് ഐ ഹാവ് അണ്ടർസ്റ്റുഡ്’ എന്ന പുസ്തകവും പ്രകാശനം ചെയ്തു. ശ്രീരാമകൃഷ്ണ പരമഹംസന്റെ ദർശനങ്ങളും സന്ദേശങ്ങളും സമകാലിക സമൂഹത്തിലെ പ്രസക്തിയും പുസ്തകത്തിൽ പ്രതിപാദിക്കുന്നു.
വിശ്വാസ്യത, പ്രൊഫഷണൽ നിലവാരം, ഉത്തരവാദിത്തം, നവീകരണം, ഫലപ്രദമായ സ്വയംനിയന്ത്രണം എന്നിവയിലൂടെ ഭാവിസജ്ജമായ ഡിജിറ്റൽ മാധ്യമ അന്തരീക്ഷം ശക്തിപ്പെടുത്തേണ്ടതിന്റെ ആവശ്യകതയാണ് കോൺക്ലേവ് മുന്നോട്ടുവച്ചത്. നന്ദിപ്രകടനം, ദേശീയഗാനം, നെറ്റ്‌വർക്കിങ് സെഷൻ എന്നിവയോടെ പരിപാടി സമാപിച്ചു.
